FIN DE SEMANA CON MOITA ARTE… GALEGA!

Mañá domingo celébrase o Día das Letras Galegas, polo que este fin de semana queremos propoñervos un achegamento lúdico á arte e artistas da nosa terra. De seguro que se facedes unha investigación sobre a arte galega atoparedes moitísima información e moi interesante. Nós fixemos unha pequena escolma que agardamos vos faga pasar momentos divertidos xuntos. Escollede o que máis vos guste, que pasedes un fin de semana xenial!

A CERÁMICA DE SARGADELOS: A cerámica de Sargadelos é coñecida en todo o mundo. As súas vaixelas, xoias, figuras… son moi especiais tanto pola cor azul cobalto que empregan como polos seus deseños. A nosa proposta é que vos convertades en artistas transformando pratos de papel en vaixelas de Sargadelos. Para conseguilo só necesitades pratos de papel e témpera azul (como vedes o azul cobalto é moi intenso, así que se non tedes tempera tan escura podedes mesturar un pouquiño de negro ao voso azul). Na imaxe tedes algúns deseños de Sargadelos, podedes facer algúns deles ou inventar uns novos!

ILUSTRACIÓN GALEGA, LEANDRO LAMAS: Na actualidade hai moitísimos ilustradores e ilustradoras galegas que fan uns traballos preciosos e moi orixinais. Hoxe queremos presentarvos a un deles, Leandro Lamas. Podedes colorear as súas láminas (premede na imaxe para descargala) ou ben atrevervos a ilustrar coma el, seguro que vos sairá xenial!

Mirade que ilustracións tan coloridas fai Leandro! Podedes velas en moitas portadas de libros, discos, murais, carteis… 

PREME NA IMAXE DE ABAIXO PARA DESCARGAR O COLOREABLE

PINTURA GALEGA, JULIA MINGUILLÓN: Xulia Minguillón era unha pintora figurativa lucense, figurativa porque as cousas que debuxaba recoñecíanse moi ben. Os seus cadros representaban escenas cotiás, mirade!

A continuación deixámosvos este cadro: “Escola de Doloriñas” para que o convertades nun crebacabezas (lembrade seguir as liñas de puntos moi amodiño). O orixinal podedes velo no Museo Provincial de Lugo. Premede na imaxe para descargar o PDF

ESCULTURA GALEGA, CAXIGUEIRO: E se vos atrevedes coa escultura presentámosvos a un escultor de Mondoñedo, Daniel Río Rubal, coñecido como Caxigueiro. Se queredes coñecer un pouquiño a súa obra premede na imaxe. E xa sabedes, podedes crear as vosas propias esculturas empregando materiais da natureza, barro, plastilina, material de refugallo.. Animádesvos?