IOGA NA CASA

Boas tardes!

Aquí vos vai, de parte da Profe Lucía, unha recomendación de exercicios de ioga que virá moi ben nestes días!

Ánimo e un forte abrazo virtual

OS VOSOS TRABALLOS: KENDRA, VALENTINA, YERAI E NORA.

Seguimos recibindo traballiños vosos, desta vez temos a Kendra que nos envía debuxos do monstro das cores, e as fichiñas do conto de Animais, ademais tamén fixo o experimento do virus, mirade que bonito todo, moi bo traballo.

Valentina segue traballando co conto de "Un libro" facendo máis círculos, tamén coloreou os personaxes de "Monstro Rosa" e fixo o experimento das lentellas, e fixo un vídeo moi moi chulo da canción do Monstro das cores, mirade que bo traballo.

Yerai enviounos os debuxos de Monstro Rosa, que ben lle quedaron!!! 

E por último Nora, enviunos o gran traballo que fixo do conto de "Animais", encantounos!!, tamén fixo a monstro Rosa, e unha ovelliña con algodóns (sacada das páxinas de actividades que recomendamos). Moi bo traballo, segue así. 

GRAZAS DE NOVO!!! Gústanos moito ver os traballiños que facedes. Seguide así.

PRONTO NOS VEREMOS

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: A VACA QUE PUXO UN OVO

Autores: Andy Cutbill (escritor) e Russell Ayto (ilustrador)

Editado en galego pola Editorial Patas de Peixe

Conto extraído da canle de youtube “Taxi Roberto Burela”

BREVE INFORMACIÓN DO CONTO: Este conto tan divertido trata temas tan importantes como a construción da autoestima e da intelixencia emocional e pon en valor os logros que se poden conseguir a través da amizade, a cooperación e a solidariedade. Ademais trata de maneira comprensible para os máis pequenos o tema da adopción e dos diferentes tipos de familias, a través do amor incondicional que amosa a protagonista ao seu bebé pitiño.

ACTIVIDADES RELACIONADAS: A proposta de hoxe vai a ser moi divertida… que vos parece facer a vosa árbore xenealóxica? Si si, podedes facela de moitas maneiras: buscando fotos dos vosos familiares, debuxando a vosa familia, escribindo o seus nomes… lembrade que cada familia é diferente! Hai familias moi numerosas cunha mamá, un papá, varios irmáns, os avós, tíos, curmáns… outras son más pequeniñas pode ser unha mamá, unha filla e un gatiño (non esquezades ás vosas mascotas!), noutras familias hai dúas mamás, noutras un papá e moitos tíos e tías, noutras incluso pode haber unha tartaruga… Pero todas son diferentes e especiais! Anímate e descubre a túa, que de seguro é a mellor do mundo para ti!

Importante! QUE É UNHA ÁRBORE XENEALÓXICA? Pois é un debuxo (a maioría das veces con forma de árbore) na que se poden ver aos teus familiares moi ben ordenadiños e colocados dunha maneira especial: Na parte de arriba da árbore colócanse os familiares máis maiores (polo xeral os avós) e logo vas colocando debaixo dos avós aos teus tíos, tías e aos teus papás e debaixo deles aos teus curmáns e irmáns… e a ti!

Esta sería unha árbore xenealóxica tradicional, pero igual que pasa coas familias, o teu debuxo pode ser diferente porque como xa dixemos, non todas as nosas familias son iguais. Arriba esa creatividade!

Recomendacións lectoras dende o Piso de Abaixo da Escola: FAMILIAS de Oh Mami Blue e FAMILIARIUM de Mar Cerdá.

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: MONSTRO ROSA

Autora: Olga de Dios

Editado en galego por Apila Ediciones.

 Conto extraído da canle de Youtube “Peque Juguetes y Sorpresas”

BREVE INFORMACIÓN DO CONTO: Este conto tan divertido, que ademais conta con numerosos premios, ensínanos a valorar a diversidade como elemento enriquecedor da nosa sociedade e as diferencias que nos fan únicas e únicos.

ACTIVIDADES RELACIONADAS: Hoxe deixámosvos dúas actividades que vos van a facer pasar moi bos ratos. A primeira é unha proposta da propia autora do conto, que consiste en colorear os personaxes e repasar os seus nomes (se vos atrevedes tamén podedes debuxar vós mesmos ao monstro rosa, a ra de tres ollos, ao paxaro amarelo, o monstro azul, ao becho pelota… ).

Premede na imaxe para descargar todos os coloreables:

A outra actividade que vos propoñemos é moi saborosa! Imos a elaborar un batido rosa. Na imaxe de abaixo tedes os ingredientes. Para a elaboración precisades a axuda dalgún maior da familia porque teredes que picar a froita e mesturala moi ben coa batidora. Pero, é moi sinxelo e poderedes facer unha merenda saudable e moi moi rica.

XOGO E APRENDO NA CASA II

Xa están aquí as recomendacións deste fin de semana! Webs, e perfís educativos nas redes sociais con actividades e tarefas sinxelas e educativas.

DALE TIEMPO AL APRENDIZAJE: No blog da mestra de educación infantil Patricia, podemos atopar moitos e variados recursos educativos descargables (actividades e xogos de lecto-escritura, un crebacabezas das emocións…) e tamén reseñas sobre contos e unha lapela de recursos premium moi recomendable.

KROKOTAK: Web repletiña de propostas sinxelas e divertidas. Dende manualidades para facer con materiais de reciclaxe a xogos de psicomotricidade. Tamén ten unha sección para aprender trucos para debuxar, actividades divididas en épocas e festas do ano, para practicar o trazado das letras…

FUN WITH MAMA: E de novo un perfíl de Instagram. Nesta ocasión o perfíl de Nadia T unha mamá que comparte un montón de actividades divertidas, manipulativas, científicas… ideais para facer na casa! Buscade no Instagram @funwithmama ou premede na imaxe.

OS VOSOS TRABALLOS: ENZO, CLAUDIA, NORA, VALENTINA, YERAI, AINOA E DIEGO.

Seguimos recibindo máis fotiños dos traballos que facedes na casa. Desta vez Enzo e Claudia fixeron un teatriño para representar os contos que vos imos recomendando, encántanos!!! Tamén traballan moitísimo, repasando os números, coloreando os personaxes do conto para facer títeres con eles, facendo monstros moi divertidos. Mirade nas fotos o ben que quedaron.

E no caso de Nora e a súa familia, desta vez animáronse facendo un rico biscoito de mazá, para celebrar a chegada da primavera como no conto "Desayuno de primavera", que boa pinta!!! e que boa cociñeira!!! Nora, cando voltemos ao cole queremos probar un anaquiño.. Tamén traballaron con conto de "un libro".

Valentina tamén se animou a facer os experimentos propostos no conto "Un libro", mirade que ben o pasou!!! Moi bo traballo!!!

Yerai tamén se animou a facer o experimento proposto no conto de "Un libro", seguro que o pasache xenial. Quedou moi bonito. Moi bo traballo!!!

E por último, Ainoa e Diego tamén nos mandaron os seus traballos. Fixeron cousiñas de todos os contos que vos fomos poñendo, "Polo camiño", "Perdido", "Monstro das cores", "Coronavirus", "A vella Lulula" e "desayuno de primavera", aínda que a tarta foi para celebrar o cumple de Diego. Moitísimas felicidades!!!! Prepara as orelliñas para cando te vexamos...Moi bo traballo aos dous, fixéstelo xenial.

Moitísimas grazas por enviarnos as fotos, fainos moita ilusión ver aos nosos pequerrechos e pequerrechas. Botámolos moitísimo de menos.

GRAZAS

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: ANIMAIS

Autores: Antonio Rubio (escritor) e Óscar Villán (ilustrador)

 Editado en galego pola Editorial Kalandraka.

Pinchando na imaxe podedes ver o conto.

 Conto extraído da web Kalandraka TV

BREVE INFORMACIÓN DO CONTO: Os animais deste conto aparecen pouco a pouco ata reunirse nun final no que se pon en pulo o valor da amizade. No enlace podedes ver a Bea Campos contando e cantando este contiño no que ademais poden intervir as nenas e nenos

ACTIVIDADES RELACIONADAS: Hoxe deixámosvos unha actividade elaborada por nós: Un caderno de investigación sobre os animais do conto! Este caderno é só unha idea, se tedes impresora na casa podedes imprimir o PDF e traballar sobre el, pero se non tedes podedes usalo de guía para elaborar o voso propio caderno de investigación (incluso podedes buscar máis información e curiosidades sobre estes animais… ou sobre outros polos que teñades interese). Agardamos que o pasedes xenial! Ah! E coma sempre, se o precisades podedes pedirlle axuda aos maiores.
Pinchando na imaxe podedes ver o documento.

 NOTA: O caderno de investigación pode facerse de moitas maneiras… debaixo do nome de cada animal hai unha liña, nela podes escribilo ti (ou intentalo). As preguntas poden responderse escribindo ou debuxando. Por exemplo:

Na ficha da pantera preguntamos de que cor son a maioría delas, para contestar podedes escribilo ou ben pintar un circuliño da cor correspondente.

Na ficha da cegoña podedes responder escribindo, repasando o que escribe un maior ou debuxando a resposta.  

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: UN LIBRO

Autor: HervéTullet

Editorial: Kókinos

E se tedes o conto na casa podedes probar a contalo desta maneira, traballando os ritmos. Pinchando na imaxe  podedes ver paso a paso como facelo.

Actividade extraída de http://despertandoeldeseodeaprender.blogspot.com/2014/11/un-libro-de-herve-tullet-aplicado-musica.html

BREVE INFORMACIÓN DO CONTO: ao abrir o conto só se ve un círculo amarelo e invita ao lector a pulsar ese círculo co dedo e descubrir o que pasa. Folla a folla aparecen novos desafíos e novas sorpresas. É unha forma diferente de facer lectura, a través do xogo.

ACTIVIDADES RELACIONADAS:

Pintar con espuma e colorante: necesitamos un prato cheo de espuma ( a cal alisaremos un pouco coa man) e unhas gotas de colorante alimentario enriba. Cun pau imos estendendo o colorante e pintando. Ao final podemos estampar o resultado nunha cartolina e deixar secar.

 Actividade extraída da web http://www.clubpequeslectores.com/2016/04/jugamos-cuentos-herve-tullet.html

Tarros da calma de 2 cores: nunha botella de plástico engadimos auga e colorante. Opcionalmente podemos poñerlle glicerina á auga para que sexa máis espesa e se mova máis despaciño. Despois engadimos algo de aceite ata encher case completamente a botella. Pegamos o tapón con pegamento forte para evitar que se abra. E listo!!! agora toca xirala e ver como os líquidos non se misturan e como o aceite cambia de cor ao pasar pola auga coloreada.

Na foto podedes ver como o amarelo do aceite cambia a verde ao pasar polo azul da auga. É unha maneira divertida e relaxante de experimentar a mistura de cores.

 Actividade extraída da web http://www.clubpequeslectores.com/2016/04/jugamos-cuentos-herve-tullet.html

Xogo con tapóns: se temos pola casa tapóns ou calquera outra obxecto das cores azul, vermalla e amarela, traballaremos un pouco de lóxico-matemática con este conto. Podemos facer series, representando as follas do conto, agrupar por cores, ...

Actividades extraídas das webs:

http://aulainfantil-susana.blogspot.com/2019/01/jugando-con-un-libro-de-herve-tullet.html

http://plastificandoilusionesenlainfancia.blogspot.com/p/un-libro-herve-tullet.html

OS VOSOS TRABALLOS

 Mirade que traballos tan bonitos do monstro de cores e sobre o coronavirus  nos envían Nora, Yerai e Vega, moi bo traballo. Moitas grazas.

 Traballos Nora

Traballos Yerai

Traballo Vega

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: DESAYUNO DE PRIMAVERA

Fai uns días comezou a primavera e para celebralo deixámosvos este conto, esperamos que vos guste.

Autora: Pilar Redondo Benítez        Ilustradora: Joana Bruna         Editorial: Amigos de papel

BREVE INFORMACIÓN DO CONTO: Chega a primavera e todos os animais espertan do seu sono invernal e o bosque énchese de vida. Zorro atopa unha cesta abandonada cun rico biscoito dentro. Ten moitas gañas de comer un anaco, pero antes decide buscar ao seu dono e así pedirlle se o poden compartir. Na súa búsqueda crúzase con varios animais que se van sumando ao seu obxectivo. Finalmente, atoparán á dona do biscoito e descubrirán que o seu obxectivo era xustamente o de organizar unha festa de benvida para compartir ese rico biscoito.

ACTIVIDADES RELACIONADAS:

Biscoito de mazá: Igual que os animaliños do bosque se vos animades podedes facer este rico biscoito para celebrar a chegada da primavera. Aquí vos queda a receita, se algún se anima que nos mande a foto e poñerémola no blog. Podedes vela pinchando na imaxe.

Actividade extraída da web https://www.lacuenteriarespetuosa.com/desayuno-de-primavera/

Memory cos personaxes do conto: Se tedes impresora podedes imprimir o pdf e recortar os debuxos para facer un memory, e pasar un ratiño divertido. Fai clic na imaxe para acceder.

Debuxos para colorear: neste enlace podedes colorear os personaxes que aparecen no conto e utilizalos para facer un teatriño. Fai clic na imaxe para acceder.

Experimento primavera: Plantar unha faba, lentella, ou calquera outra semente que teñades pola casa nun recipiente transparente e ver o que ocorre. Se pinchades na imaxe podedes ver paso a paso como tedes que facer. Recordade se vos animades a facelo, mandade fotos.

E para rematar esta entrada deixamos unha canción sobre a primavera, do álbum “Coas miñas mans” de Pablo Díaz.

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: EL CORONAVIRUS

Autores: David López e José Luis López

Conto extraído da canle de Youtube de Jose Luis López

BREVE INFORMACIÓN DO CONTO: Trátase dun conto creado para poder explicar ós nenos e nenas a complexa situación que estamos a vivir debido á pandemia do COVID- 19. Dunha forma sinxela e adaptada á infancia, este conto relata a nosa propia historia recoñecendo a importante labor de todos os heroes e heroínas que están loitando por nós, así coma a nosa misión de quedar na casa. Ademais, achega á historia un final esperanzador que agardamos poder vivir pronto.

ACTIVIDADES RELACIONADAS: Logo de ver o conto podedes facer o seguinte experimento para que os nenos e nenas tomen conciencia da necesidade do xabón para unha hixiene das mans efectiva contra os virus. Nun prato botamos auga e unha pouca pementa (virus), tocamos a superficie da auga coa puntiña do dedo e comprobamos como a pementa se queda pegada na nosa pel. Despois, limpamos o dedo e introducímolo en xabón líquido. Agora, protexidos co xabón volvemos tocar a superficie da auga e... Sorpresa! Os virus (pementa) escapan cara as beiras do prato!

(Imaxe e idea extraída do blog 2PROFES EN APUROS. Podedes premer no enlace para ver o artigo completo)  

https://www.dosprofesenapuros.com/blog/experiencias/experimento-nos-lavamos-las-manos/

Deixámosvos aquí tamén dous vídeos con cancións que poden acompañarnos nesa rutina do lavado das mans. A primeira foi publicada polo grupo teatral Migallas e, a segunda, pola especialista en linguaxe Tamara Chubarovsky.

E por último, compartímosvos outros dous contos que nos poden axudar a transmitirlles ós nenos e nenas o que está a pasar. Facede clic nas imaxes para acceder a eles.

Este conto foi creado polo ilustrador Dalmaus.

E estoutro polo Colegio Oficial de la Psicología de Madrid

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: O MONSTRO DE CORES

Autora: Anna Llenas 

Editado en galego pola Editorial Flamboyant

Adaptación animada extraída da canle de Youtube “Peque Juguetes y Sorpresas”

Curta creada por un grupo de alumnas da Escola Universitaria de Deseño Industrial (EUDI), UDC.

BREVE INFORMACIÓN DO CONTO: Este conto de Anna Llenas é ben coñecido por nós. Nunca escoitástedes?:  temos que volvernos verdes ou… estoume poñendo vermello! Pois aquí está a explicación, este monstro tan liado precisa axuda para ordenar as súas emocións. Un conto para traballar o mundo das emocións, para coñecelas, comprendelas e aprender a dominalas.

ACTIVIDADES RELACIONADAS: En internet podedes atopar moitísimos recursos para traballar as emocións a través deste conto. Incluso na web da autora ofrecen de maneira gratuíta varias propostas (a continuación poñemos os enlaces).

Pero a nosa suxestión para estes días (e todos os días) é falar e falar! As nenas e nenos precisan expresar os seus sentimentos e ás veces non é sinxelo facelo, por iso intentade atopar un ratiño cada día para preguntarlles como se senten e para falarlle tamén de como vos sentides vós. De seguro que lles axudará a comprender as súas emocións… e as dos demais!

Aquí tedes algunhas ideas para traballar a través do conto:

http://www.annallenas.com/ilustracion-editorial/el-monstruo-de-colores-recursos-gratis.html#.XnNQRqhKh5Y

E por último, deixámosvos un pouco de música, que igual que os contos, debería estar presente todos os días nas nosas vidas!  A CANCIÓN DO MONSTRO DAS CORES en GALEGO...

E a que xa coñecedes en CASTELÁN... 

Agardamos que o monstro das cores nos axude a poñer algo de orde nas nosas emocións nestes días tan raros. Unha aperta grande!

XOGO E APRENDO NA CASA

Dende “O piso de abaixo da escola” seguimos recomendando webs, e perfís educativos nas redes sociais para que podades realizar actividades e tarefas sinxelas e educativas cos vosos fillos e fillas durante estes días. Agardamos que vos sirvan de axuda e sobre todo que vos permitan gozar do tempo en familia dunha maneira lúdica e enriquecedora!

Estade moi atentos porque cada fin de semana teredes no blog novas recomendacións! Unha apertiña e moito ánimo!

• ENTRE NUBES ESPECIALES: No blog da mestra de educación especial Paola, podemos descargar un montón de PDF con actividades sensoriais, coloreables, recomendacións de películas e xogos para móbil e tablet, actividades para exercitar a memoria, ioga para nenas e nenos…

• UN MAR DE IDEAS PARA EDUCACIÓN INFANTIL: O blog da mestra María del Mar Quirell está repletiño de recursos para traballar conceptos matemáticos a través da metodoloxía ABN.

• THE DAD LAB: E se tedes instagram, aquí vos deixamos este perfil tan divertido de Sergei Urban, un papá moi enxeñoso. No perfil podedes atopar un montón de experimentos de ciencia para facer de maneira moi sinxela con nenas e nenos a partir de 3 anos. A pesar de que está en inglés, as explicacións que acompañan os vídeos podedes traducilas… aínda que só vendo o vídeo xa veredes que non fai falta nin entender o que di! Buscade no Instagram @thedadlab ou premede na imaxe.

URSO, VIEIROS E MAROSA RECOMENDAN: UN CONTO CADA DÍA

O CONTO DE HOXE É: POLO CAMIÑO

Autora: MarianaRuíz Johnson 

Editado en galego pola Editorial Kalandraka

Conto cantado extraído da canle de Youtube “O mundo ao revés. Sonia Hermida”

E deixamosvos tamén está versión en castelán da canle de Youtube "Musicando Badabum" de Cristina Martín Sanz, pois algúns e algunhas xa coñecedes o conto con esta melodía.

BREVE INFORMACIÓN DO CONTO: Trátase dun contiño para cantar e contar… ata 10. Sinxelo e divertido especialmente indicado para os máis pequenos. Atrevédevos a cantalo xuntos?

ACTIVIDADES RELACIONADAS: Para hoxe propoñemos varias actividades para traballar os números de maneira lúdica. Propostas coas que poderedes xogar e aprender xuntos empregando cousiñas que de seguro tedes na casa (se non tedes algún destes materiais como por exemplo os pauiños ou as cunchas podedes cambialos por garabanzos, fabas… ou calquera outra cousa que teñades na casa e sexa sinxela de manexar).

(Todas as imaxes foron extraídas de Pinterest.)

#EUQUEDONACASA

Por aquí vos deixamos unha proposta de actividades que podedes facer na casa estes días de confinamento. Está pensado para os nenos e nenas na aula do Corzo Vieiros (5º de educación infantil). 

Premendo no debuxo do Corzo Vieiros podedes acceder ó documento.

MOITO ÁNIMO E PACIENCIA! O Corzo Vieiros agarda por nós!