BO NADAL DENDE A AULA DA RAPOSA MAROSA!

Xa levamos uns días gozando das vacacións de Nadal coas nosas familias, pero non queríamos deixar de ensinarvos algunhas das cousiñas chulis que fixemos na clase para decorar a aula e a escola! Como eran moitas, escollimos as que máis nos gustaron, agardamos que tamén vos gustaran a vós! Desexamos que o pasedes moi moi ben neste final de ano e que o 2020 estea cheo de amor e felicidade! Aquí vos deixamos algunhas imaxes do Nadal na aula da Raposa Marosa!

POSTAIS DE NADAL!

RENOS E BOLA XIGANTE!

ESTRELAS CON PINTURA MÁXICA!

3 BOLAS PARA A ÁRBORE DE NADAL!

PANXOLIÑA: CHEGOU O NADAL

As nenas e nenos de infantil quixeron despedir este trimestre cantando esta Panxoliña, "Chegou o Nadal".
Esperamos que vos guste.

PIÑEIRO

Na aula de 4 anos ao longo deste trimestre traballamos o conto de Piñeiro de Kalandraka, contámolo, aprendemos a cantalo, e fixemos os debuxos. E xa para rematar grabámonos cantando e fixemos este vídeo. Esperamos que vos guste.

COMEZANDO O INVERNO...

Para darlle a benvida ó inverno na aula do Oso Urso renovamos a nosa decoración outonal por outra máis axeitada á época do ano. Nesta entrada contámosvos como o fixemos.

O primeiro que fixemos foi medir a cortiza na que pendurariamos un novo mural, así saberiamos canto papel continuo iamos precisar sen pasarnos nin quedarnos curtos. Para iso, encaixamos moitos policubos e tivemos que traballar en equipo porque a vara era tan longa que se rompía con moita facilidade. 

Despois, escollimos as cores: pintura de cores frías coma o inverno e papel de cor azul escuro, pois no inverno hai poucas horas de luz. A técnica empregada pareceunos moi divertida: tiñamos que facer rodar pelotas cheas de pintura por riba do papel! 

Para rematar, pegamos uns anaquiños de porexpan que parecían copos de neve no medio dunha tormenta e, por suposto, puxémoslle un título á nosa obra de arte. Mirade que resultado máis chulo!

ANIVERSARIOS 1º TRIMESTRE

O martes pasado pola tarde nas tres aulas de infantil celebrámos os aniversarios das nenas e nenos que cumplen anos neste trimestre. Mirade que ben o pasamos!!!!

CIFRAS E LETRAS COA RAPOSA MAROSA

Durante o primeiro trimestre na aula da Raposa Marosa traballamos coas letras dos nosos nomes e tamén o concepto de número e cantidade do 1, 2 e 3. Para traballar cos nosos nomes, ademais de rotular as mesas e o recuncho da asemblea, elaboramos un xogo que nos axudaba a recoñecer as vogais e algunhas consoantes, a direccionalidade e a ordear correctamente as letras dos nosos nomes. Tanto traballamos que ata somos capaces de colocar os nomes dos nosos compañeiros e compañeiras.

Tamén fixemos xogos de números! Con tres aros de cores formamos conxuntos de 1, 2 e 3 elementos! Conxuntos de elementos iguais e tamén distintos. Contamos, colocamos os números na casiña dos conxuntos e comprobamos que todo fose correcto recontando entre todos!

Ademais traballamos o concepto de número co dado xigante que temos na aula. 1, 2, 3, 4, 5 e ata 6 puntiños contamos nas caras do dado. Lanzámolo, contamos e logo seguíamos instruccións: Temos que dar tantos saltos como puntimos contemos, temos que buscar tantas pinturas como puntiños saian no dado. Pasámolo xenial! E como veredes na imaxe de abaixo, tamén pintamos números, fixemos os trazos, decoramos...

CANCIÓN CHIVOS CHIVONES

Ao longo deste trimestre na aula de 6º de infantil nas sesións de música traballamos este conto, e a súa canción, que atopamos no seguinte blog, Cuentos Encantados, gracias por compartila.
Para cantala fixemos catro grupos, tendo en conta os personaxes do conto e empregamos distintos instrumentos, mirade que ben quedou.

AZUL + AMARELO = VERDE

Xa fai unhas semanas que na aula da Raposa Marosa descubrimos que se xuntamos a cor azul e a amarela conseguimos... VERDE! 

Parece maxia pero e que mesturando ben dúas cores primarias podemos obter un montón de cores novas. Neste caso o verde.

Primeiro traballamos moito coas tres cores e ata fixemos un xogo no que por equipos tiñamos que separar obxectos azuis, verdes e amarelos de entre outros iguais pero de diferentes cores. Mirade!

Logo xuntamos todo e fixemos liñas rectas para facer comparacións... 

Cal é máis longa? Por que? En cal hai menos obxectos? Cantos obxectos hai na máis curta? Foi un importante traballo de investigación no que tivemos que contar, observar, contrastar opinións...

Despois de tanto traballo tocou descansar un pouco xogando coa plastilina, pero... por que cada un de nós tiña unha boliña azul e outra amarela? 

Claro! Se as xuntamos e amasamos ben temos plastilina verde. Vaia sorpresa!

Ademais, esa mesma semana, a profe Sara contounos un conto xenial:

 "Pequeno azul, pequeno amarelo" de Leo Leonni. 

Despois fixemos un experimento xuntando témpera azul e amarela dentro dunha bolsiña... mesturamos e mesturamos pero non manchamos nadiña as mans! E claro, tanto se xuntou que a témpera volveuse verde.

E xa para rematar cos nosos experimentos fixemos cor verde coas nosas propias mans!

...Azul nunha man, amarelo noutra, xuntámolas e, tachán! as dúas mans son agora verdes. Mirade que divertido!

O MOSTO CONVERTEUSE EN VINAGRE

Noutra entrada do blog xa vos ensinamos como embotellamos o viño na aula do Oso Urso. Unha vez rematado ese proceso, precisábamos escollerlle un nome e etiquetalo. 

Unha mañá, ulímolo de novo para buscar inspiración e... Que sorpresa! Non ulía a viño! Fixéramos VINAGRE! Conversando e conversando, descubrimos porque non nos saíra o viño: os recipientes nos que fermenta deben ser de madeira, barro ou metal e o noso era de cristal! Entón collemos de novo a lista dos pasos que se deben seguir para facer viño e, entre todos, escribimos NON na fase da fermentación, porque era na que fallaramos. Somos uns investigadores e investigadoras xeniais!

Algúns trouxemos da casa etiquetas moi chulas para o viño pero, como tiñamos vinagre, non nos valían. Aínda así, probamos a poñelas na botella porque nos esforzamos moito e facíanos ilusión. Mirade que bonitas!

Despois, puxémonos mans á obra. Comezamos facendo propostas de nomes para o vinagre e, unha vez escribimos todas no encerado, cada un foi poñendo unha marquiña debaixo da que máis nos gustaba pero antes tiñamos que ler en alto o que dicía alí para estar seguros e seguras de que non nos equivocábamos. Despois fomos contando as marcas e escribindo o número de marcas que había e... Gañou o nome "VINAGRE COLE DE QUIROGA" con 8 votos!

Outro día, creamos as etiquetas para o noso vinagre, escribindo o nome elixido e debuxando uvas. Nisto xa somos uns expertos e expertas. Mirade canta variedade de deseños!

Pero como só tiñamos unha botella e había 18 etiquetas era necesario escoller unha. Unha vez máis, fixémolo por votación. Un por un fomos colocando un policubo debaixo da etiqueta que máis nos gustaba, sen saber de quen era, recontamos e... Eliximos a de Inyanara! Tamén con 8 votos!

Unha vez reducido o tamaño da etiqueta, pegámolo na botella e só nos quedaba pensar que facer con el. Algúns e algunhas queríamos vendelo pero non nos poñíamos de acordo co prezo. Entón, César tivo unha idea moi boa: levárllelo aos cociñeiros Jorge e Fina. Pero que día o podíamos levar? Estaba claro! Cando tocara xantar ENSALADA! 

E así o fixemos. O pasado xoves levamos a botelliña para o comedor e Fina e Jorge agradecéronolo moito. Pola tarde, Jorge devolveunos a botella baleira. Ese día a ensalada tivo un sabor moi especial: SABOR A VINAGRE COLE DE QUIROGA!

ADORNOS DE NADAL SOSTIBLES

Onte os nenos e nenas de infantil xuntámonos para darlle unha nova vida a unha chea de CDs, converténdoos en adornos de Nadal moi coloridos. E é que nestas datas tan sinaladas reutilizar material aparentemente inservible é moi importante, pois así contribuímos ó coidado do noso planeta.

Agora o noso corredor está moi alegre e a nosa ilusión a flor de pel! Estamos desexando levar o adorno para casa e penduralo alí para que poidan velo Papá Noel e os Reis Magos. Xa queda menos...

MES DA CIENCIA NA AULA DA RAPOSA MAROSA

Novembro é o mes da ciencia en galego, e na clase da Raposa Marosa convertímosnos en científicas e científicos. Durante estas últimas semanas fixemos 3 experimentos moi divertidos e cos que aprendimos moitas cousas. Agora vos contamos!

Para facer o primeiro, "Flores Blancas", contamos coa axuda dunha experta en natureza, a profe Vania, que nos explicou como se alimentan as plantas, como hai que coidalas, cales son as partes das flores... e sobre todo nos axudou a facer o experimento.

Puxemos unas margaridas brancas nun botiño con auga e na auga botamos unhas gotas de colorante azul... parece ser que por "arte de ciencia" as flores brancas acabarían de cor azul! 

E case o conseguimos, tiveron que quedar moitos días bebendo desa auguiña azul e aínda así só conseguimos que se puxeran un pouquiño azúis. Pero non importa, sabemos que os científicos teñen que traballar moito e que ás veces teñen que repetir os experimentos para que saian perfectos.

No segundo experimento "Cores en Movemento", empregamos de novo auga e colorante pero nesta ocasión, colorante de cor azul e de cor amarelo. Conectamos 3 vasos cun pouquiño de papel absorvente , no vaso da esquerda botamos colorante azul e no da dereita amarelo...

Cal foi a nosa sorpresa que poucos minutos despois, o vaso do medio comezou a encherse de auga de cor VERDE! 

 Por último, o terceiro experimento "Flota ou afúndese?" axudounos a comprender que hai obxectos que poden flotar cando os botamos na auga e outros non. O máis sorprendete foi comprobar que as mandarinas teñen un flotador natural, cando botamos unha na auga flotaba sen dificultade, pero cando a outra lle quitamos a súa pel, xa non flotaba! Non o podíamos crer, que sorpresa!

A ciencia é moi importante! Para que a vida no noso planeta mellore e para que se poidan facer descubrimentos que nos axuden a resolver problemas é necesario explorar e pasalo xenial a través da ciencia. Queremos darlle as grazas a todas as científicas e científicos do mundo, pode que algunha ou algún de nós sexamos uns importantes científicos e científicas!

FILTRADO E EMBOTELLADO

Hai tempo que na aula do Oso Urso comezamos a preguntarnos que podíamos facer co mosto que estaba a fermentar. Levaría xa demasiados días? Estaría estragado? Precisaríamos máis tempo? Como non tiñamos na clase ningún experto en vendima decidimos escribir unha carta para pedir axuda ás nosas familias. 

Na casa, preguntamos e investigamos e case todos coincidimos en que o viño debía fermentar arredor dun mes. Como tiñamos marcado no calendario de outubro o día que vendimaramos, comezamos a riscar e contar os días que levaba o mosto fermentando. Unha vez rematamos tivemos que continuar contando no de novembro e resultou que xa pasaran 37 días! Iso era máis dun mes! Tiñamos que facer algo co noso viño!

Consultando un papel que nos trouxo Leo no que o proceso de elaboración do viño estaba moi detallado, descubrimos que só nos faltaba filtralo e embotellalo e puxémonos mans á obra. 

Na fábrica había dúas bandexas unha que dicía FILTRADO e outra EMBOTELLADO. Tivemos que lelas e adiviñar o que había que facer en cada unha. Por pequenos grupos, fomos filtrando o mosto pasándoo por un coador moi despaciño e, despois, embotellámolo. Como a botella era moi estreita empregamos un aparello que se chamaba embude. Isto foi moi emocionante... Caberá todo dentro da botella ou non? Fixemos diferentes estimacións... Parecía que si pero ó final... Botouse un chisquiño por fóra!

Mentres tanto Leo converteuse en director da fábrica e foi supervisando todo o que facíamos con moita atención e, cando unha tarefa xa estaba conseguida, marcábaa cunha cruz.

Por último, puxémoslle o tapón para pechar a botella. Agora só nos queda por pensar un nome para o viño e etiquetalo. Prestade moita atención que pronto volo contaremos!