A semana pasada aprendestes un montón
de cousas novas experimentando como auténticas científicas e científicos, pero
hoxe comeza unha nova semana así que cambiamos a investigación por unhas
propostas con moito ritmo… Xa está aquí a semana musical de Urso, Vieiros e
Marosa!
Si, encántanos a Música, durante estes
meses gozamos coas cancións de Chocolata, El baile del cambio, Pan de Millo, Dime
que fixeches, O polo Pepe, Mariluz Avestruz, Peixiños do mar… E as nosas
mascotas saben o moito que nos gusta cantar, bailar, descubrir sons… Por iso,
esta semana queremos que o pasedes xenial coas actividades musicais que
preparamos para vós. Aquí vos deixamos as primeiras!
MEMO
AUDITIVO: Para comezar, este memo auditivo que podedes crear con cousiñas
que de seguro tedes na casa… Premede na imaxe para ver en grande os materiais
que precisades para facelo.
Xa tedes todos os materiais? Pois
comezamos. Precisamos que os vasiños de iogurt bebible estean ben limpiños
(tamén podedes empregar botellas de batido ou de leite, sempre que sexan
opacas, é dicir, que non se vexa o que hai no seu interior).
Agora metemos nas botelliñas, de dúas
en dúas, un material distinto: en dúas metemos garavanzos, noutras dúas area,
noutras boliñas de papel (que podedes facer con xornais ou catálogos de
supermercado), clips...
Nós propuxemos estes materiais pero se
hai algún que non teñades podedes cambialo por outro que haxa na casa
(lentellas, chinchetas, canicas…) ou ben facer menos botelliñas.
Truco! Non enchades de todo as
botellas porque é preciso que quede sitio no interior para que se movan e sonen
cando os axitemos.
Por último “pechamos” as botellas
empregando globos, fixádevos como está na imaxe!
Importante! para poder facer o memo
ten que haber dúas botellas de cada material porque unha vez acabado tedes que
emparellar as que pensedes que soan igual… Ese é o reto!
Para saber se fixestes ben o reto
podedes marcar a parte de abaixo das botellas cun rotulador permanente. Podedes
poñer marcas como formas, letras, cores… Así poderedes comprobar se tivestes
acertos con todos os sons.
Outra maneira de complicar máis ou
menos o xogo é empregando globos de cores distintas (as botellas co mesmo son
terían a mesma cor) ou empregando todos os globos da mesma cor (así é máis
complicado e teredes que agudizar o voso sentido do oído).
Atrevédesvos a facer o memo e xogar
cos sons? Seguro que o pasaredes xenial!
Este memo
auditivo está recollido en “Experiencias y experimentos. 50 actividades
sensoriales para entretenerse en casa” de @diverbichillos
DITADO MUSICAL: E se queredes sacarlles máis partido ós vasiños de sons que preparastes, aquí vai outra proposta. Pedídelle a alguén que escolla dous dos vasos e vos dite un ritmo composto por unha sucesión de cinco sons. Cando escoitedes o ritmo completade a ficha coa cor correspondente! Aquí vos deixamos algunha proposta de fichas para completar pero só son unha idea... Podedes adaptar o dictado ó voso gusto! Premede na imaxe para descargalas.
INSTRUMENTOS
MUSICAIS CASEIROS: E a outra proposta que facemos hoxe seguro
que vos gustará moito… Que vos parecería poder construír os vosos propios instrumentos musicais con materiais de
refugallo! Pois no blog “Club Peques Lectores” hai 7 propostas moi sinxelas
coas que poderedes gozar da música!
Unha flauta feita con palliñas, unhas
maracas con culleres, un tambor cunha caixa de queixiños, un kazoo co tubo do
papel de cociña, unha guitarra cunha caixa de cartón, un tambor feito cun bote
e un xilófono empregando vasiños.
Premede na imaxe e accederedes a toda
a información.
Como sempre vos dicimos, estas son só propostas que
vos facemos, pero podedes empregar a vosa imaxinación para construír os
instrumentos que máis vos gusten empregando un montón de materiais que podedes
atopar na casa ou na natureza! Estamos desexando ver o ben co pasades facendo e
interpretando música cos vosos propios instrumentos caseiros!
No hay comentarios:
Publicar un comentario